Quist proget s’ha sviluppà our da meis grond interess e mia paschiun per tecnicas textilas e tecnicas artischanalas. I’m dà adüna darcheu üna gronda satisfacizun e plaschair da savair dovrar quellas, da renovar ellas e da tillas pudair portar inavant. Our da persvasiun lavur eu a man e less crear moda estetica, natürala e dürabla. La moda dess esser eticamaing güstifichabla, perquai lavura cun material indigen. La lana ch’eu douvr principalmaing es s-chetta lana da besch engiadinaisa ed – ella vain per mai filada a man. Cun lana filada a man dvainta la structura d’üna surfatscha fatta culs spaits irregulara, giova cun glüm e sumbriva. Uschea es lura eir il toc da büschmainta organic e sco ün prodot chi deriva directamaing da la natüra – el viva! – quai am plascha e quai es mia pretaisa. A mai interessa l’inter process da producziun d’ün toc da büschmainta e quel dess esser transparent eir pel cliaint. Il minz da quist proget es natüralmaing eir mia gronda vöglia da lavurar creativmaing, d’experimentar e d’imprender ed il giavüsch da pudair perfecziunar e m‘ approfuondir illa tematica.